
第一世噶玛巴教言集1KM2རྗེ་འགྲོ་བའི་མགོན་པོ་རིན་པོ་ཆེའི་རྣམ་ཐར་སྐྱེས་རབས་དང་བཅས་པ་རིན་ཆེན་ཕྲེང་བ་འབྲིང་པོ་བཞུགས་སོ། །
1-2-4a
༄༅། །རྗེ་འགྲོ་བའི་མགོན་པོ་རིན་པོ་ཆེའི་རྣམ་ཐར་སྐྱེས་རབས་དང་བཅས་པ་རིན་ཆེན་ཕྲེང་བ་འབྲིང་པོ་བཞུགས་སོ། །
༄། །ཡུལ་ཀ་ལིང་ཀའི་རྒྱལ་པོ་ཟླ་བ་རྣམ་པར་གནོན་པ་བྱ་བར་སྐུ་སྐྱེ་བ་བཞེས་པ་ཚུན་ཆད་ཀྱི་བདུན་གསུངས་པ།
༄༅། །རྗེ་འགྲོ་བའི་མགོན་པོ་རིན་པོ་ཆེའི་རྣམ་ཐར་སྐྱེས་རབས་དང་བཅས་པ་རིན་ཆེན་ཕྲེང་བ་འབྲིང་པོ་བཞུགས་སོ། །ན་མོ་རཏྣ་གུ་རུ། བློ་གྲོས་ཆེན་པོ་ཐེག་མཆོག་གིས་བསྟན་པས། །ཤེས་བྱ་སྤྲོས་བྲལ་ཐུགས་ཀྱི་མེ་ལོང་ལ། མངོན་ཤེས་ལྔ་གཟིགས་ལམ་གྱི་ཡོན་ཏན་རྫོགས། །གདུལ་བྱ་སྨིན་གྱུར་རིན་པོ་ཆེ་ལ་འདུད། །འོ་སྐོལ་གྱི་བླ་མ་རིན་པོ་ཆེ་འདིས། དང་པོར་དགེ་བའི་བཤེས་གཉེན་ཆེན་པོ་མཆོག་གི་བླ་མ་ལས་སྐུ་རབ་ཏུ་བྱུང་བ་ནས། ཡུལ་དབུས་སུ་གསན་པ་ལ་བཞུད་པ་ལ། དཀའ་བ་ཇི་ལྟར་ཉམས་སུ་བླངས་པ་དང་། ཐོག་མ་མེད་པ་ནས་ཐུགས་སྦྱངས་པའི་སྟོབས་ཀྱིས་ཡོན་ཏན་རིན་པོ་ཆེ་དུ་མས་བརྒྱན་པ་ལ་སོགས་པ་བརྗོད་ཀྱིས་མི་ལང་ཡང་། འདིར་བདག་གིས་ཐོས་ཚད་ཆེ་ལོང་ཙམ་ཞིག་མདོར་བསྡུས་ཏེ་བརྗོད་པར་བྱའོ། །དེ་ལ་དང་པོར་བཤད་རྒྱུད་ཀྱི་གདམས་ངག་ལ། དགེ་བཤེས་ཕྱ་པ་ལ་སོགས་པ་ལ་ཇི་ལྟར་གསན་པ་དང་། 
1-2-4b
བསྒྲུབ་རྒྱུད་ཀྱི་གདམས་ངག་ལ། དགེ་བཤེས་ཤར་བ་པའི་སྤྱན་སྔར་ཇི་ལྟར་གསན་པ་དང་། གདམས་པ་གནད་དུ་བསྣུན་པའི་གདམས་ངག་ལ། ཆོས་རྗེ་རིན་པོ་ཆེའི་སྤྱན་སྔར་ཇི་ལྟར་བཞུགས་པའི་ལོ་རྒྱུས་མང་དུ་ཡོད་ཀྱང་འདིར་མི་བརྗོད། དག་སྣང་གཟིགས་ལུགས་ལ་སོགས་པ་ཅུང་ཟད་ཅིག་འདིར་བྲི་སྟེ། དང་པོར་དགེ་བཤེས་ཤ་བ་གླིང་པའི་སྤྱན་སྔར། བླ་མ་སྒོམ་ཚུལ་དང་མཇལ། དེའི་དུས་སུ་སློབ་དཔོན་སྒོམ་པ་སྒྲོལ་མ་དཀར་མོར་གཟིགས་གསུང་། དེ་ནས་བླ་མ་ལྷ་རྗེ་དང་མཇལ་དུས་སུ། སྒོམ་པ་ཚུལ་ཁྲིམས་སྙིང་པོ་ལ་མཐོང་སྣང་ཨེ་བྱུང་གསུང་། སྒྲོལ་མ་དཀར་མོར་མཐོང་ཞུས་པས། ཁོ་བསྐྱེད་རིམ་བརྟན་པ་ཡིན་གསུང་། དེ་ནས་བྱ་བཟངས་སུ་བཞུགས་དུས་སུ་རྗེ་བཙུན་མ་ཞལ་གཟིགས། བདེ་མཆོག་ལྷན་སྐྱེས་ཞལ་གཟིགས། ནམ་མཁའ་ལས་ཌཱ་མ་རུ་དང་ཨཱ་ལི་ཀཱ་ལིའི་སྒྲ་ཐོས། དེ་ནས་ངོས་བཟངས་སུ་བྱོན་དུས་སུ༑ གཞན་གྱི་སེམས་ཤེས་པ་ལ་སོགས་པ་མངོན་ཤེས་གསལ་བ་དང་རིང་བསྲེལ་བྱོན་གསུང་། ཡང་སློབ་དཔོན་རིན་པོ་ཆེ་མོན་གྱི་རྒྱལ་པོའི་མཆོད་གནས་ལ་བཞུགས་དུས་སུ། རྒྱགས་ཆད་ནས་ལེན་དུ་བྱོན་པའི་ལམ་ཀར། ཤིང་ཆེན་པོ་གཅིག་གི་རྩ་ན་བཞུགས་པའི་ཚེ། ནགས་གསེབ་ན་ཚུར་སྟག་གཅིག་བྱུང་ནས། བླ་མ་ལ་བསྐོར་བ་གསུམ་བྱས་ནས་ཐལ། ཡར་ལམ་ལ་མི་གཉིས་ཀྱི་སྟག་བྱུང་སར་བར་དུ་བསྐྱལ་
1-2-5a
༄༅། །གསུང་། དེར་ཕྱག་ཚང་དཀུ་བ་ཆེན་པོ་ཅིག་ཆང་གིས་བཀང་ནས་བུད་མེད་གཉིས་ཀྱིས་དྲངས་གསུང་། ཡང་གངས་དཀར་ལ་བཞུད་ནས་མར་བྱོན་དུས་སུ། སྙེ་མོའི་ལུང་པ་བ་མོ་ཉེ་དྲུང་ན་མར་བྱོན་པའི་ཚེ། གཡས་ན་བྲག །གཡོན་ན་ལྗོངས་ཅིག་ཡོད་གསུང་། ཁང་པ་གཅིག་གི་སྒོ་ཁ་ན། བུད་མེད་བཞི་ཐགས་འཐག་ཅིང་སྣང་། བུད་མེད་གཅིག །ཇོ་བོ་དྲོ་གསོལ་ལམ་གསུང་། རུང་གསུངས་པས། བུད་མེད་གཅིག་ནང་དུ་སོང་ནས། ནང་དུ་བྱོན་གསུང་། འདིར་ཁྱེར་ཤོག་བྱས་པས། ཅང་མི་ཉེས་ནང་དུ་བྱོན་ཟེར། དེ་ནས་ནང་དུ་བྱོན་ཙམ་ན་མིའི་ཚིགས་ཀྱི་ཚོད་མ་དཀུ་བ་ཕྱེད་བྲགས་པ་གཅིག་གང་དྲངས། བླ་མས་ཐེ་ཚོམ་མེད་པར་གསོལ་ལོ། །བུད་མེད་གཅིག་ལ་བཞིར་སྣང་ཡང་བཞི་པོ་དེ་གཅིག་དུ་འདུས་པར་གཟིགས། ཡང་དཀུ་བ་དེ་ནམ་མཁའ་ལ་བཟེད་པས། ཆུ་སྐྱ་བཞིན་ཆུ་དཀར་ཏིང་ངེ་བ་དེ་གང་དྲངས། དེ་བླ་མས་གསོལ་བས་རོ་མཆོག་དང་ལྡན་པར་བྱུང་གསུང་། ལག་བདེ་བུད་མེད་དེའི་ཕྱག་གཡས་པའི་མཐེབ་གོང་ན་བདེ་མཆོག་ཞལ་བཞི་ཕྱག་བཅུ་གཉིས་པ་ཡུམ་དང་བཅས་པ་གཅིག་གཟིགས་གསུང་། དེ་ནས་སྒོ་ཁ་ན་མར་བྱོན་ཙམ་ན་བཞི་ཀ་སྒོ་ཁ་ན་སྣང་གསུང་། དེ་ཅི་ལགས་ཞུས་པས། བདེ་མཆོག་གི་མཁའ་འགྲོ་མ་བཞི་ཡིན་གསུང་། དེ་ནས་བླ་མ་རྫོགས་པའི་སྤྱན་སྔར་བྱོན་ཙམ་ན། བླ་མ་རྫོགས་པའི་ཞལ་
1-2-5b
ནས༑ དེ་རིང་ཁྱོད་ལ་མཁའ་འགྲོ་མ་བཞིས་དྲོ་དྲངས་ཨང་གསུང་། དྲོ་དྲངས་ཞུས་པས། མཁའ་འགྲོ་མས་ཁྱོད་བྱིན་གྱིས་བརླབས་པ་ཡིན་གསུང་། སྔར་མཁའ་འགྲོ་མས་དྲངས་པའི་ཚིགས་ཀྱི་ཚོད་མ་དེ། ཁྱིམ་བདག་ཨ་ཤོ་ཀ་བྱ་བའི་བུ་དྷརྨ་སིདྷི་བྱ་བ་ཤི་ནས། ཏར་ཏི་ཏའི་དུར་ཁྲོད་དུ་བསྐྱལ་བ་སྐད་ཅིག་ལ་བསླངས་པ་ཡིན་གསུང་། དེང་སང་དེ་ན་བཞུགས་སམ་ཞུས་པས། དེ་ན་མི་བཞུགས་སུ་པ་ཏིའི་དུར་ཁྲོད་དུ་མཁའ་འགྲོ་མ་འདུ་བའི་དུས་ཡིན་པས་དེ་ན་འདུག་གསུང་། ཁྱོད་མིན་གྱི་རྒྱལ་པོའི་དྲུང་དུ་བཞུད་པའི་དུས་སུ། བུད་མེད་གཉིས་ཀྱིས་བཏུང་བ་དྲངས་པའི་བུད་མེད་དེ་གཉིས་ཀྱང་མཁའ་འགྲོ་མ་ཡིན་གསུང་། བླ་མའི་ཐུགས་ལ། འདི་བླ་མའི་བྱ་ལྐོག་དགོན་པ་འདྲ་སྙམ་པ་བྱུང་བའི་དུས་སུ། འདི་ཁྱོད་ཀྱི་བླ་མའི་བྱ་ལྐོག་དགོན་པ་འདྲ་ཨང་གསུང་། ད་ཁྱོད་བླ་མ་ལྷ་རྗེ་དེ་ཅི་གསུང་བ་བཞིན་གྱིས་གསུང་། དེ་ལ་སོགས་པ་གཞན་ཡང་མང་དུ་གསུངས། དེ་ནས་བླ་མ་ལྷ་རྗེའི་སྤྱན་སྔར་ཕྱག་ལ་བྱོན་པའི་དུས་སུ། གྲོལ་སྒོམ་དང་ཁམས་པ་སེ་བོ་གཉིས་ཕྱི་ན་སྡོད་གསུང་ནས། དཔོན་སློབ་ལྔ་ལྷན་ཅིག་ཏུ་བཞུགས་པའི་དུས་སུ། ཉམས་དགའ་བའི་བླ་བོ་མང་པོ་གནང་། སྤྱིར་སྒོམ་ཆེན་པ་ཡོན་ཏན་ལ་རློམ་པ་མི་རུང་བ་དང་། གསང་དགོས་པ་ཡིན་པར་གདམས་པའི་བླ་བོ་ཕྱིར་རྒྱ་ཅན་མང་དུ་གསུངས། ངའི་བླ་མ་མིད་ལ་དེ་ཟད་པར་མེའི་ཏིང་ངེ་
1-2-6a
༄༅། །འཛིན་ལ་སྙོམས་པར་ཞུགས་པའི་དུས་སུ། ངས་མེའི་སྣ་མ་རྟེན་ནས་བྲོས་པ་ཡིན། ཟད་པར་ཆུའི་ཏིང་ངེ་འཛིན་ལ་སྙོམས་པར་ཞུགས་པའི་དུས། ངས་ཆུ་ལེགས་གཅིག་ཏུ་མཐོང་བ་ཡིན། དེ་ལ་སོགས་པ་ཟད་པར་གྱི་ཏིང་ངེ་འཛིན་ཐམས་ཅད་ལ་སྙོམས་པར་ཞུགས་པའི་ཡོན་ཏན་དང་། མངོན་པར་ཤེས་པ་རྒྱ་ཆེན་པོ་མངའ་ཡང་རློམ་པ་རྡུལ་ཙམ་ཡང་མ་མཆིས་གསུང་། ཡང་གཟིམས་མལ་དུ་ང་སྐྱོལ་གསུང་ནས། སྔར་གྱི་བླ་མ་རྫོགས་པ་དང་ཇི་ལྟར་མཇལ་བ་དང་། མཁའ་འགྲོ་མས་འཚོ་བ་ཇི་ལྟར་དྲངས་པའི་ལོ་རྒྱུས་རྣམས་ཚུར་གསུངས་ནས། ཡོན་ཏན་ལ་རློམ་པ་སྐྱེར་མི་རུང་བ་དང་། གསང་དགོས་པར་མང་དུ་གདམས་གསུང་། དེ་ནས་ཟངས་ཟླུམ་དུ། སློབ་དཔོན་སྒོམ་པ་ལ་ཕྱག་སྐྱེལ་དུ་བྱོན་པའི་ས་ན། བླ་མས་ཇི་ལྟར་གསུངས་པ་ལྟར་ཡིན་གསུང་ནས། སྔར་བླ་མ་ཆེན་པོས་ཇི་ལྟར་གསུངས་པ་རྣམས་ཀྱང་མཁྱེན་པ་དང་། དེ་དང་མཚུངས་པའི་ལོ་རྒྱུས་དང་གདམས་ངག་མང་དུ་གསུངས་པ་དང་། ཡང་བླ་མ་ལྷ་རྗེ་ལ་དགྱེས་རྡོར་འོད་ཀྱི་ར་བ་ན་བཞུགས་པ་གཅིག་དུ་མཐོང་གསུང་། ཡང་སློབ་དཔོན་སྒོམ་པ་ལ་ལན་གཅིག་རྗེ་བཙུན་རྣལ་འབྱོར་མར་གཟིགས། དགྱེས་རྡོར་དུ་ལན་གསུམ་གཟིགས། འོད་ཕུང་པོ་གཅིག་ཏུ་ལན་ཅིག་གཟིགས་གསུང་། དེ་ང་རང་སྣང་བ་དག་པ་ཡིན། དེ་མ་ཡིན་ན་གཞན་གྱིས་ཀྱང་མཐོང་དགོས་
1-2-6b
གསུང་༑ ཡང་སློབ་དཔོན་སྒོམ་པ་ལ་ལན་ཅིག་འོད་ཀྱི་རྣམ་པ་གཅིག་དུ་མཐོང་། སློབ་དཔོན་དེ་ཅི་ལགས་ཞུས་པ་ལ། ངས་ཟད་པར་ཆུ་བསྒོམས་པ་ཡིན་གསུང་། སློབ་དཔོན་སྒོམ་པས་ཟད་པར་གྱི་སྐྱེ་མཆེད་ཀུན་ནུས་པ་ཡིན་གསུང་། དེ་ནས་བླ་མ་ལྷ་རྗེ་འདས་ནས་སློབ་དཔོན་སྒོམ་པའི་དྲུང་དུ་བྱོན་ཙམ་ན། སློབ་དཔོན་འཕགས་པས་སྟོན་ཆོས་ངའི་ཟླ་ལ་འདོང་གསུང་། སློབ་དཔོན་འཕགས་པའི་དགོན་པ་ཕོ་རོག་རྫོང་ཆུང་ན་བྱོན། དེར་བླ་མ་ལྷ་རྗེ་འདས་པའི་ལོ་རྒྱུས་གསུང་། དེའི་དུས་སུ་སློབ་དཔོན་ཉིད་ཀྱིས་ངུས་པས། སློབ་དཔོན་དགོན་པ་དང་འཕགས་པ་དང་། སློབ་དཔོན་དང་གསུམ་གྱིས་དུས་གཅིག་ཏུ་བླ་མ་ཆེན་པོ་མདུན་དུ་བྱོན་པར་གཟིགས། ཕྱག་མང་པོ་འཚལ། དེ་ནས་དར་གཅིག་ལོན་པ་དང་བླ་མ་ལྷ་རྗེ་འཇའ་ཚོན་བཞིན་དུ་ཡལ་དེ་ཐལ་གསུང་། ཡང་དུས་ཕྱིས་ལན་ཅིག །སློབ་དཔོན་བསྒོམ་པའི་དྲུང་དུ་བྱོན་པའི་དུས་སུ། ང་ཁམས་སུ་འགྲོ་བྱས། སློབ་དཔོན་བསྒོམ་པའི་ཞལ་ནས། དེའི་དུས་སུ་ང་འཆི། བླ་མའི་གསུང་བགྲོས་ཡིན་པས་ལན་ཅིག་སོང་གསུང་། སློབ་དཔོན་རིན་པོ་ཆེའི་ཞལ་ནས། དེའི་དུས་སུ་ངས་དུས་གསུང་༑ སློབ་དཔོན་བསྒོམ་པའི་ཞལ་ནས། ཁྱོད་མ་ངུ་དང་། ངས་ཁྱོད་ལ་མཚར་པོ་ཅིག་བཟླའོ་གསུང་། སློབ་དཔོན་ཉིད་ཀྱིས་དང་པོ་བསྒྲུབ་པ་ཅི་ཙུག་མཛད་པ་དང་། དེ་ནས་ཇི་ལྟར་ནུས་པ་དང་། དེ་ནས་
1-2-7a
༄༅། །དེང་སང་གི་བར་དུ་ཇི་ལྟར་མཛད་པ་དང་། དེང་སང་རྡོ་རྗེ་གདན་སྐད་ཅིག་གིས་བལྟ་བར་ནུས་པ་དང་། ཆོས་ཐམས་ཅད་སྒྱུ་མར་ཤེས་པ་ཇི་ལྟར་བྱས་བྱས་བཏུབ་པ་ཡིན་གསུང་། ཡང་སློབ་དཔོན་རིན་པོ་ཆེ་གྲུ་བཞི་དགོན་པ་ན་དང་པོ་བྱོན་དུས་སུ། བུད་མེད་རྒྱན་ཅན་གཅིག་གིས་འཚོ་བ་དྲངས། གངས་དཀར་ན་བཞུགས་དུས་ན་ཡང་བུད་མེད་གཅིག་གིས་འཚོ་བ་དྲངས། དེ་མ་ཡིན་པ་ཡང་མཁའ་འགྲོ་མས་འཚོ་བ་དྲངས་པ་བག་རེ་བྱུང་གསུང་། དེ་ནས་སློབ་དཔོན་རིན་པོ་ཆེ་ཁམས་སུ་བྱོན་ཙམ་ན། བྱང་ལམ་ན་མར་བྱོན་པའི་དུས་སུ། ནུབ་གཅིག་གི་རྨི་ལམ་ན། བུད་མེད་ཚོན་མོ་གཅིག་གི་རོ་རྙེད་པ་རྨིས། རྩིབ་མ་རྣམས་ཕྱེ་བའི་ནང་ནས་ཌཱ་མ་རུ་མང་པོ་བྱུང་བས་སྒྲ་རང་གྲགས་དང་། ནམ་མཁའ་ལ་ཐལ། དེའི་ཟླ་ལ་སློབ་དཔོན་ཡང་བཞུད་པས་ཨུ་རྒྱན་དུ་བྱོན། དེར་བུད་མེད་གཅིག་ན་རེ། འདི་ཡན་ཆད་ནི་ཡེ་ཤེས་ཀྱི་མཁའ་འགྲོ་མ་རྣམས་ཀྱི་གླིང་ཡིན། འདི་མན་ཆད་ནི་འཇིག་རྟེན་གྱི་མཁའ་འགྲོ་མ་རྣམས་ཀྱི་གླིང་ཡིན་ཟེར་བ་གཅིག་བྱུང་གསུང་། དེ་ནས་སྐམ་པོ་གནས་ནང་དུ་བྱོན་ནས་གཟིགས་པ་དཔག་ཏུ་མེད་པ་མངའ༑ དུས་གཅིག་གི་རྨི་ལམ་ན་བླ་མ་ལྷ་རྗེ་དང་མཇལ་གསུང་། ཁྱོད་མངོན་དགའི་འཕོ་བ་གྱིས་དང་གསུང་། དེར་ནམ་མཁའ་ལ་དགྱེས་རྡོར་ལྷ་དགུའི་དཀྱིལ་འཁོར་སྤྲུལ། དེ་ནས་བདག་དགྱེས་རྡོར་ལྷ་དགུ་
1-2-7b
དངོས་སུ་བྱས་ནས། ནམ་མཁའ་ལ་བཞུགས་པའི་དགྱེས་རྡོར་གྱི་ཐུགས་ཀར་ཞུགས་པར་བྱས་གསུང་། བླ་མ་ལྷ་རྗེའི་ཞལ་ནས། ཁྱོད་བཏུབ་པར་འདུག་གསུང་། ཡང་ནུབ་གཅིག་བླ་མ་ལྷ་རྗེ་དང་བྲག་བྱ་སྐྱིབས་ན་ཐུགས་དམ་མཛད་ཅིང་བཞུགས་པ་ལ། སློབ་དཔོན་གྱིས་ཞུས་པ། བླ་མ་བརྫུས་ཏེ་སྐྱེས་པ་ལགས་སམ་བྱས་པ་ལ། མ་ལགས། མངལ་འགྲིམས་པ་ཡིན་གསུང་། སློབ་དཔོན་ལ། སློབ་དཔོན་ཡོད་དམ་ཞུས་པ་ལ་མེད་གསུང་། འོ་ན་ཇི་ལྟར་ལགས་ཞུས་པ་ལ། གཉུག་མ་ལ་རྒྱུན་ཆད་མེད་གསུང་། གདམས་ངག་ནི། སྐྱེས་པའི་ཡུལ་དེ་སྤངས་ན་ཆགས་སྡང་བྲལ་བར་ངེས། ཚུལ་ཁྲིམས་དོན་དང་ལྡན་ན་བདེ་འགྲོ་འཐོབ་པར་ངེས། ཐབས་ལ་ནན་ཏན་བྱས་ན་ལམ་དེ་ཆོད་པར་ངེས། མ་བཅོས་རང་སར་བཞག་ན་དོན་དེ་རྟོགས་པར་ངེས། བླ་མ་དང་མཇལ་བ་དང་ཚིགས་བཅད་འདི་གསུངས་པ་དེ་པོམ་ཕུག་དགོན་པ་ན་ཡིན་གསུང་། ཡང་ཉ་སེའི་ཚེས་བརྒྱད་ཀྱི་ཉི་མ་ཕྱི་འཕྲེད་ལ། སློབ་དཔོན་གྱི་ཞལ་ནས་འཇའ་ཚོན་གདུགས་འདྲ་བ་དང་དཀྱིལ་འཁོར་འདྲ་བ་བྱུང་། དེའི་དཀྱིལ་ན་བླ་མ་ལྷ་རྗེ་བཞུགས་ཟིན། བླ་མ་ཅི་གསུང་ཞུས་པ་ལ། བུ་གཉིས་སུ་མེད་པ་ལྟ་བའི་དོན། །ཡེངས་པ་མེད་པ་བསྒོམ་པའི་དོན། །ཟུང་དུ་འཇུག་པ་སྤྱོད་པའི་དོན། །དེ་གསུམ་དབྱེར་མེད་འབྲས་བུའི་དོན། །ཞེས་ཚིགས་སུ་བཅད་པ་གཅིག་གསུངས། ཉ་
1-2-8a
༄༅། །སེའི་ཚེས་བཅོ་ལྔ་ལ། བླ་མ་ལྷ་རྗེའི་འདས་མཆོད་གཏོང་དུས་ན། བླ་མ་ལྷ་རྗེའི་སློབ་མ་བཞི་སེམས་ཅན་གྱི་དོན་རླབས་པོ་ཆེ་བྱེད་གསུང་། ང་དགོད་བྲོ་བས་གད་མོ་གཅིག་བྱས། དེ་ཙམ་ན་དགེ་བཤེས་ཤེས་རབ་འབུམ་ན་རེ། བླ་མ་ཅི་ལ་དགོད་པ་ཡིན་གསུང་། རང་ཐད་དགོད་པ་ཡིན་ཞེས་གསུང་། གསེར་རྐོང་ཡེ་ཤེས་སྙིང་པོ་དང་། ཡ་ཟི་སྔོན་མོ་གཉིས་ནུབ་ཕྱོགས་ན་སེམས་ཅན་གྱི་དོན་རླབས་པོ་ཆེ་བྱེད༑ སྒོམ་པ་ཞི་མཛེས་དང་། དྭགས་པོ་ཕག་སྒོམ་གཉིས་ཤར་ཕྱོགས་ན་སེམས་ཅན་གྱི་དོན་རླབས་པོ་ཆེ་བྱེད་གསུང་། སྨོན་ལམ་བླ་མ་ཁྱོད་རང་འདི་ནས་ཚེ་འཕོས་ནས་ནུབ་ཕྱོགས་པདྨ་ཅན་དུ་སྐྱེ། སྐྱེས་ནས་ཀྱང་རབ་ཏུ་འབྱུང་། དེའི་དུས་ཀྱི་ཁྱོད་ཀྱི་མཁན་པོ་དེ་མངའ་རིས་པ་བཟང་པོ་དེས་བྱེད་པར་སྣང་། དེ་དང་ང་ལ་འབྲེལ་བ་ཅི་ཡོད་ཞུས་པས། སྐྱེ་བ་བཞིའི་སྔོན་ནས་པདྨ་ཅན་ན་ཁྱོད་ཀྱི་མཁན་པོ་བྱས་པ་ཡིན་གསུང་༑ མངའ་རིས་པ་བཟང་པོ་དེ་དེང་སང་གི་དུས་ན་ཚེའི་རིག་འཛིན་ཐོབ་པ་ཅིག་ཡིན་གསུང་། སྨོན་ལམ་བླ་མ་ཁྱོད་སྔོན་ཕན་ཆད་ལ་སྐྱེ་བ་ལྔར་རབ་ཏུ་བྱུང་། བར་དུ་ཅིག་ཀྱང་མ་ཆོད་གསུང་། ཡང་བླ་མ་ལྷ་རྗེའི་སློབ་མ་དགེ་ཚུལ་གཅིག །བླ་མ་དངོས་ཀྱི་ཡང་སློབ་མ་སྔ་ཤོས་ཡིན། དེ་དེང་སང་ལྷོ་ཕྱོགས་ཀྱི་འཇིག་རྟེན་གྱི་ཁམས་ན་རྒྱལ་པོ་བདེ་སྤྱོད་བཟང་པོ་བྱ་བ་ཡོད་པའི་དྲུང་དུ་བྱང་ཆུབ་སེམས་དཔའི་སྤྱོད་པ་
1-2-8b
བྱེད་གསུང་། ཡང་པོམ་ཕུག་ན་བཞུགས་དུས་སུ་རི་གསུམ་གྱི་སྣང་བ་གཅིག་བྱུང་གསུང་། སྤྲིན་ནམ་ན་བུན་གཏིབས་པའི་གསེབ་ན་ལྷོ་ཕྱོགས་དཔལ་གྱི་རིའི་སྒྲ་གྲགས། གཅན་གཟན་སྣ་ཚོགས། བྱ་སྣ་ཚོགས། ཤིང་སྣ་ཚོགས་ཡོད་པ་གཅིག །དེའི་རྩེ་མོ་ན་རྣལ་འབྱོར་མ་གཅེར་བུར་འདུག་པ། སྐྲ་གྲོལ་བ། བདེ་བའི་ཉམས་དང་ལྡན་པ། རྒྱན་མེད་པ། ཐོད་པ་དང་གྲི་གུག་ཕྱར་བ་ལག་པ་གཡོན་པའི་གྲུ་མོའི་ནང་དུ་རྐང་པ་གཡས་པ་བཅུག་པ་གཅིག་བྱུང་གསུང་། ཡང་དུས་གཅིག་ལ་དགྱེས་རྡོར་གྱི་ལྷ་ཚོགས་རྣམས་གཟིགས་གསུང་། གྲུ་བཞི་ན་རྡོ་རྗེ་རྣལ་འབྱོར་མ་ཞལ་གཉིས་མ་གཟིགས་གསུང་། བདེ་མཆོག་ལྷན་སྐྱེས་ཡབ་ཡུམ་གཟིགས་གསུང་། འདིར་ཉ་སེའི་ཚེས་བཅོ་ལྔའི་ནུབ་མོ་དགྱེས་རྡོར་ཡབ་ཡུམ་གཟིགས་གསུང་། དེ་ནས་མོས་གུས་བག་ཙམ་གཅིག་བྱས་ནས་འོད་ཀྱི་གོང་བུ་གཅིག་དུ་ཡལ་གསུང་། འདི་ན་སྒྲོལ་མ་དཀར་མོ་མཐོང་གསུང་། ཡང་ཉ་སེའི་འདས་མཆོད་ཀྱི་རྡིང་ལ། རྡོ་རྗེ་གདན་གྱི་བྱང་ཕྱོགས་ན་མ་ཧེ་རྒྱུ་བའི་ཚལ་བྱ་བ་ཅིག་ཡོད། དེ་ན་སློབ་དཔོན་སྒོམ་པ་དང་མཇལ་གསུང་། སློབ་དཔོན་གྱི་ཞལ་ནས། ཁྱོད་འདིར་འོང་བའི་ནུས་པ་ཡོད་པ་དེ་མཚར་གསུང་། ཡང་ཁྱི་ལོའི་ཉ་སེའི་འདས་མཆོད་ཀྱི་རྡུང་ལ། རྗེ་བཙུན་རྡོ་རྗེ་རྣལ་འབྱོར་མ་གཙོ་མོ་དབུ་སྟོང་སྤྱན་སྟོང་ལ་དཔའ་མོ་སུམ་བཅུ་སོ་དྲུག་གིས་བསྐོར་བ་གཅིག་གཟིགས། 
1-2-9a
༄༅། །གཙོ་མོའི་ཞལ་ནས། འདི་ན་ཧེ་རུ་ཀ་དཔལ་རྒྱུ། །སེམས་ནི་དྲི་མེད་ཡིན་པར་འདོད། །དག་པ་ཆོས་ཀྱི་སྤྲུལ་པ་ཡིན། །ཕག་མོའི་གཟུགས་སུ་བསྟན་པ་ཡིན། །ཞེས་གསུངས་པ་གསན། ཡང་དུས་གཅིག་ན། ནམ་མཁའ་ལ་ལྷ་ཚོགས་མང་པོ་གཟིགས། དེའི་དུས་སུ་སྒྲ་གྲགས་པ་ནི། ལྟ་བསྒོམ་ནམ་མཁའ་ཆུ་དང་མཚུངས། །སྤྱོད་པ་བཀག་མེད་དེ་བསྒྲུབ་མེད། །དེ་གསུམ་དབྱེར་མེད་གཉུག་པ་ཡིན། །ཀུན་རྫོབ་པི་ཝང་སྒྲ་དང་མཚུངས། །དེ་དོན་དེ་ཉིད་དབྱེར་མེད་ཡིན། །ཞེས་གསུངས་པ་ཡང་གསན་གསུང་། ཡང་དུས་གཅིག་ན། ནམ་མཁའ་ལ་ཨཱ་ལི་ཀཱ་ལིའི་སྒྲ་བྱུང་གསུང་། དེའི་རྟིང་ལ་བདག་མེད་མ་བཅོ་ལྔའི་ལྷ་ཚོགས་གཟིགས། བདག་མེད་མའི་ཞལ་ནས་ཨཱ་ལི་ཀཱ་ལིའི་སྒྲ་བྱུང་། དེའི་དུས་སུ་སློབ་དཔོན་རང་གིས་ཀྱང་གསུང་བ་བྱུང་གསུང་། ཡང་དུས་གཅིག་ཏུ། ཏོང་ཀུན་ལྟ་བ་གཅིག་བྱེད་དགོས་སྙམ་ཙ་ན། དེང་ཚ་མཁར་དུ་ཕྱིན་ཟིན། དེ་ཙམ་ན་དགེ་བཤེས་བླ་མས་ངོ་ཨེ་ཤེས་བསམ་ཙ་ན། ཁོ་དགོད་པ་དང་དགའ་བའི་རྟགས་ཤེས་པར་བྱུང་གསུང་། ཕྱུག་པོ་གཅིག་གི་བུར་སྐྱེས་ཟིན་གསུང་། ཡང་བླ་མ་གནས་ནང་ན་བཞུགས་པའི་དུས་སུ། བདག་མེད་མ་དང་ཁྲོ་རྒྱལ་མི་གཡོ་བ་ཞལ་སྦྱོར་གྱི་ཚུལ་དུ་གཟིགས། པོམ་ཕུག་ན་བཞུགས་དུས་སུ། བདུད་རྩི་འཁྱིལ་པ་ལྷ་དགུའི་དཀྱིལ་འཁོར་ལ། གཙོ་བོ་བདག་མེད་མ་དང་ཞལ་
1-2-9b
སྦྱོར་གྱི་ཚུལ་དུ་གཟིགས། ལྷ་མོ་རྣམས་ཀྱི་ཞལ་ནས་དབྱངས་ཡིག་དང་གསལ་བྱེད་ཀྱི་ཡི་གེའི་སྒྲ་གྲག །དང་པོ་འཇའ་ཚོན་བཞིན་དུ་བྱུང་། ཕྱིས་ཀྱང་འཇའ་ཚོན་བཞིན་དུ་ཡལ་གསུང་། ཡང་ཚིགས་འཁོར་གཅིག་གི་དུས་སུ། རྒྱུ་མ་ཆེན་མོ་ལྷ་ལྔའི་དཀྱིལ་འཁོར་གཟིགས། ཡང་སློབ་དཔོན་རིན་པོ་ཆེས་སིང་གའི་གླིང་དུ་བྱོན་ཙམ་ན། རྣལ་འབྱོར་པ་གཅིག་སྣང་། གང་ཡིན་སྙམ་ཙ་ན། སློབ་དཔོན་རྡོ་རྗེ་དྲིལ་བུ་པར་སྣང་གསུང་། ཡང་དུས་གཅིག་དུ་དཀའ་ཐུབ་ཅན་གོས་དཀར་པོ་གྱོན་པ་གཅིག་བྱུང་བས། སངས་རྒྱས་ལ་ཆོས་ཉན་དུ་ཨེ་འདོད་ཟེར། སློབ་དཔོན་གྱི་ཐུགས་ལ། མར་མེ་མཛད་ནི་འདས། ཤཱཀྱ་ཐུབ་པའང་འདས༑ བྱམས་པ་ཡིན་ནམ་བྱས་པ་ལ། ཡིན་ཡང་ཉན་ཟེར། བྱམས་པའི་སྤྲུལ་པ་ཡིན་ནམ་བྱས་པ་ལ། ཡིན་ཡང་ཉན་ཟེར། དེར་ཉི་མའི་འོད་ཟེར་གཅིག་བྱུང་དེའི་སྟེང་དུ་བཞུད། ཉི་མའི་འོད་ཟེར་དེ་ལྷམ་ལྡེམ་བྱེད་པ་བྱུང་། སངས་རྒྱས་དེའི་དྲུང་དུ་བྱོན་ཙམ་ན་བྱམས་པ་ཡིན་པར་འདུག །ལོངས་སྤྱོད་རྫོགས་སྐུའི་ཆ་ལུགས་སུ་འདུག །འཁོར་རབ་ཏུ་བྱུང་པ་མང་པོ་ཡང་འདུག །རྒྱུད་བླ་མའི་ཚིགས་སུ་བཅད་པ་ཡང་གསུངས༑ འདི་ལ་བསལ་བར་བྱ་བ་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་པ་ལ་སོགས་པ་ཟབ་མོའི་དོན་མང་པོ་གསུངས། 
1-2-10a
༄༅། །གྲོགས་པོ་རྣམས་ལ། ཁྱེད་ཀྱིས་ཅིར་གོ་བྱས་པས། སྐྱེ་བ་མེད་པར་གོ་གསུང་། ངས་ཀྱང་དེར་གོ་ཞེས་གསུང་། ཡང་བལ་པོའི་ཕར་ལོགས་རི་བྲག་གཅིག་ན་དཔལ་ལྡན་མ་ནག་མོ་ཆེན་མོས་དབུ་བྱས་པའི་དྲུག་བཅུ་རྩ་བཞིའི་སྐུ་བཞུགས། དེ་ན་སློབ་དཔོན་པད་མ་ཐེངས་རེ་བྱོན་པར་འདུག་གསུང་། དེའི་དགོས་པ་སེམས་ཅན་ལ་གནོད་ཀྱིས་དོགས་པ་ཡིན་གསུང་། ཡང་སློབ་དཔོན་ཤར་བ་ན་བཞུགས་ཙམ་ན། ཡོན་བདག་ལྕང་མ་ནམ་མཁའ་འབར་གྱི་ནུ་བོ་གཅིག་དེང་སང་སུམ་བཅུ་རྩ་གསུམ་ལྷའི་གནས་ན་སྐྱེས་ཟིན། ཁོ་ལ་ཞི་གནས་བཟང་པོ་ཡོད། ལོངས་སྤྱོད་དང་ལྡན་པར་སྣང་གསུང་། ཡང་སློབ་དཔོན་པོམ་ཕུག་ན་བཞུགས་པའི་དུས་སུ། རྒྱ་གར་གྱི་བསུ་བ་མང་པོ་བྱུང་། བུད་མེད་རྒྱན་ཅན་མང་པོས་ཤིང་རྟ་ལ་རྒྱ་གར་གྱི་ཟབ་ཆེན་མང་པོས་གཡོགས་ཟིན། རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། མུ་ཏིག་གི་ཕྲེང་བ་དང་གདུགས་དང་། གཞན་ཡང་རོལ་མོའི་རྣམ་པ་དུ་མ་བྱུང་གསུང་། ཡང་དུས་གཅིག་གི་རྨི་ལམ་ན། བྲག་བརྩེགས་བརྒྱ་རྩ་བརྒྱད་ཡོད་པ་གཅིག་གི་སྟེང་ན་སློབ་དཔོན་བཞུགས་ཙམ་ན། རི་ཟུར་ན་ཡར་ལ་བུད་མེད་རུས་པའི་རྒྱན་ཅན་བརྒྱད་ཀྱིས། མེ་ཏོག་ཕྲེང་བ་གཅིག་གིས་གཅིག་ལ་བྱིན་ནས་བླ་མའི་ཕྱག་དུ་ཕུལ། སློབ་དཔོན་གྱིས་མེ་ཏོག་དེ་རྣམས་ནམ་མཁའ་ལ་གཏོར་བས་མེ་ཏོག་ཐམ་འགགས་ནམ་
1-2-10b
མཁའ་འགགས་པ་རེད་པ་བྱུང་། དེ་ནས་སློབ་དཔོན་བྲག་དེ་ལ་འཕུར་ནས་བྲག་གི་དཀྱིལ་ཙམ་ན་ཡར་ལ་ལོག་ནས། ནམ་མཁའ་ལ་རྟ་གཅིག་སྤྲུལ། གཅིག་ལས་བརྒྱ་ཙམ་སྤྲུལ་ནས་རྟ་ལ་ཆིབས་ནས་བཞུད་གསུང་༑ དེ་ནས་སེང་གེ་ལ་ཆིབས་ནས་བཞུད། རྨི་ལམ་ཡིན་པས་གང་ལྟར་བྱས་ཀྱང་བཏུབ་པར་བྱུང་གསུང་། ཡང་སློབ་དཔོན་རིན་པོ་ཆེ་གྲོང་ཁྱེར་གྲིབ་གཏན་བལྟ་བར་འདོད་པས། གཅིག་ལས་གཉིས། གཉིས་ལས་བཞི། བརྒྱ་ལས་སྟོང་ཙམ་དུ་བྱས་ནས། བྱ་ངང་པ་བཞིན་དུ་ནམ་མཁའ་ལ་གཤེགས། གྲོང་ཁྱེར་གྲིབ་གཏན་གྱི་དཀྱིལ་ན་མར་བབས། ཁང་ཐོག་གཅིག་དུ་ཕྱིན་ཙམ་ན། ཤོད་ན་སྐྱེ་བ་མེད་པའི་སྒྲ་ལྷང་ལྷང་བརྗོད་པ་ཐོས། དེ་ནས་ནམ་མཁའ་ལ་ཕར་འཕུར། གྲོང་ཁྱེར་དེའི་ཕྲོལ་རི་བྲག་གཅིག་སྣང་། དེ་ན་ལྟད་མོ་བ་དང་མ་ཧེ་དང་སྲོག་ཆགས་མང་པོ་སྣང་གསུང་། ཡང་དུས་གཅིག་ན་མཚོ་གཅིག་གི་གཏིང་ན་པད་མ་ཡུ་བ་ས་དང་མ་འབྲེལ་བ་གཅིག་གི་ཁ་ན། སློབ་དཔོན་ཉིད་དང་དགྱེས་རྡོར་ཡབ་ཡུམ་བཞུགས་པ་ཡིན། ལྷ་མོ་བརྒྱད་ཀྱིས་པི་ཝང་སྦྲེང་བའི་སྐད་ལ། ནུབ་ཀྱི་ཕྱོགས་སུ་བདེ་བ་ཆེ་ཟེ་ལྷ་མོ་རྣམས་ཀྱིས་དེ་སྐད་ཟེར་བའི་རྡིང་ལ་ནུབ་ཕྱོགས་སུ་ཐལ། དེ་ཡང་འཆི་བ་བཟློག་པ་ལ་ཚེགས་མ་བྱུང་གསུང་། ཡང་རིན་པོ་ཆེ་ལ། དྲུང་ལྷ་ཁང་དུ་རབ་གནས་ལ་བཞུགས་པའི་དུས་སུ། དཔལ་ལྡན་མ་འཁོར་མ་མོ་
1-2-11a
༄༅། །འབུམ་དང་བཅས་པ་སྣ་ལ་གཤེགས་གསུང་། མེ་ཏོག་ཀྱང་རང་འཐོར་བྱས་པ་ཀུན་གྱིས་ཚོར་བར་བྱུང་། ཡང་རྒོངས་ཀ་གཅིག་དང་པོ་དྭགས་ལྷ་སྒམ་པོ་ཚུན་ཆད་གསལ་བར་བྱུང་གསུང་། དེ་ནས་བལ་ཡུལ་ཚུན་ཆད་གསལ་བར་བྱུང་གསུང་། དེ་ནས་ཕྱོགས་བཞི་སྟེང་འོག་གཉིས་དང་དྲུག་ཏུ་འཇིག་རྟེན་གྱི་ཁམས་དཔག་ཏུ་མེད་པ་གཟིགས་པ་བྱུང་གསུང་། བླ་མ་གྲུབ་ཐོབ་མང་པོ་ཡང་གཟིགས་གསུང་། ཡང་དགོང་ཀ་གཅིག་བླ་མ་ལྷ་རྗེ་དང་མཇལ་གསུང་། དའི་ལོ་འདི་ལ་ཀླགས་ནས་བླ་མ་དང་མཇལ་གྲངས་མང་བ་ཅི་ལགས་ཞུས་པ་ལ། རང་མོས་གུས་ཐེངས་རེ་བྱས་དགུ་ཅོག་བླ་མ་དང་མཇལ་བ་ཡིན་གསུང་། རྡོ་རྗེ་ཤེས་རབ། འོད་ཟེར་བླ་མ། དར་མ་སེང་གེ་གསུམ་སྐྱེ་བ་འདིར་ངའི་སློབ་མ་ཐེངས་གཉིས་བྱས་གསུང་། ཡང་རྣལ་འབྱོར་མ་དོ་ཛི་གི་ཏ་དེ་མི་ཉག་རྒྱལ་པོའི་བུར་སྐྱེས། དེའི་དུས་སུ་ཆུ་ནག་མོ་ཕ་རི་ནས་བཙོན་དོང་སྤྲུགས་བྱས། རྒྱལ་པོ་དེ་ལ་ཕན་ཐོགས་པར་དགོངས་པ་ཡིན། བཙོན་དེ་རྣམས་སྐྱེ་བ་ཕྱི་མ་ལ་གདུལ་བྱར་གཟིགས་པ་ཡང་ཡིན་གསུང་། སློབ་དཔོན་རིན་པོ་ཆེའི་ཞལ་ནས། བྱང་ཆུབ་སེམས་དཔའ་ཐ་མལ་པའི་ལུས་ཀྱིས་སེམས་ཅན་གྱི་དོན་བྱེད་པ་མཐོང་གསུང་། དེ་གསུང་བར་ཞུ་བྱས་པ་ལ། རྒྱལ་གྱི་གནས་བརྟན་འདྲེ་ཆུང་བ་དེང་སང་སྤྲུལ་པ་གསུམ་གྱིས་སེམས་ཅན་གྱི་དོན་བྱེད་གསུང་། སྐུ་དངོས་དེ་
1-2-11b
རྒྱལ་གྱི་དེ་ཡིན། སྤྲུལ་པ་དེ་རྒྱ་ནག་ན་ཡོད་གསུང་། ཡང་སྤྲུལ་པ་དེ་རྒྱ་གར་དང་བལ་པོའི་བར་ན་ཡོད་གསུང་། སྔོན་དཔལ་ཕག་ཚགས་པའི་སྐྱེ་བ་ཡིན་གསུང་། དེ་བླ་མ་ལ་དད་གུས་ཆེ་བ་ཅི་ལགས་ཞུས་པ་ལ། སྔོན་ཐོག་མའི་དུས་སུ་ངའི་སློབ་མ་ཡིན་གསུང་། ཡང་གཙང་ན་བྱང་ཆུབ་སེམས་དཔའ་ས་ལ་དབང་བ་གཅིག་གི་སྤྲུལ་པ་གཉིས་ཀྱིས་སེམས་ཅན་གྱི་དོན་བྱེད་པ་མཐོང་གསུང་། གཅིག་གིས་རྩང་དངོས་སུ་སེམས་ཅན་གྱི་དོན་བྱེད། གཅིག་གིས་བོད་བལ་མཚམས་སུ་སེམས་ཅན་གྱི་དོན་བྱེད་གསུང་། སློབ་དཔོན་རིན་པོ་ཆེ་བལ་ཡུལ་དུ་བཞུད་དུས་སུ། དགྱེས་པ་རྡོ་རྗེའི་ལྷ་མོ་བརྒྱད་ཀྱིས་ཁྱོད་ད་རུང་མ་འགྲོ་ཟེར། མིག་ཕྱེ་ཡང་ལྷ་མོ་བརྒྱད་ཀྱིས་ཁྱོད་ད་དུང་མ་བཞུད་ཟེར། གཡས་སུ་གཟིགས་པས་ལྷ་མོ་བརྒྱད་ཀྱིས་བསྐོར་ཟིན། གཡོན་དུ་གཟིགས་ཀྱང་ལྷ་མོ་བརྒྱད་ཀྱིས་བསྐོར་ཟིན། གཞན་ཡང་བཀའ་རྒྱུད་ཀྱི་བླ་མ་རྣམས་དང་ཡང་ཡང་མཇལ་བ་ཡིན། ཁྱད་པར་དུ་བླ་མ་ལྷ་རྗེ་ལ་མོས་གུས་བྱས་དགུ་ཅོག་མཇལ་གསུང་། བླ་མ་ལྷ་རྗེ་དཔོན་གཡོག་བཅུ་གསུམ་གྱིས་ཨུ་རྒྱན་ནས་ཉིན་ལམ་བཅུ་གཉིས་ཀྱི་ས་ན་མུ་སྟེགས་ཀྱི་རྒྱལ་པོ་གཅིག་རྟོག་མེད་ཀྱི་སྒོ་ནས་བཏུལ། ཞེས་མཛེས། དགེ་བསྙེན་བསྒོམ་ར། གར་སྟོན། གསེར་རྐོང་ཡེ་ཤེས་སྙིང་པོ། ཟིམ་ཤི་ཡེ་ཤེས་སྙིང་པོ། ཡ་ཟི་སྔོན་མོ། རྒྱ་ཆེ་ཆུང་གཉིས། གྲགས་མཛེས། ཉག་ལྡེ་
1-2-12a
༄༅། །སྟོན་པ། རེག་བསྒོམ། ཡོན་ཏན་སྙིང་པོ། དེ་རྣམས་ལ་བླ་མའི་དྲུང་དེར་རིག་པ་བརྟུལ་ཞུགས་ཀྱི་སྤྱོད་པ་ནུས་པ་དྲུག་ཡོད། བླ་མ་ལྷ་རྗེ་དེ་རྒྱ་གར་ནུབ་ཕྱོགས་པད་མ་ཅན་དུ་སྐུ་སྐྱེ་བ་བཞེས་ནས་སེམས་ཅན་དོན་བྱེད། རེས་ནི་དགེ་སློང་དུ་མཛད། རེས་རྣལ་འབྱོར་པའི་ཆ་བྱད་དུ་མཛད། སློབ་དཔོན་བིཪྺ་པའི་སྤྱོད་པ་བཞིན་མཛད། སྤྱོད་པ་དུ་མ་མཛད། མཚན་ནི་ཞི་བའི་གོ་ཆ་བྱ་བ་ཡིན། སྤྲུལ་པ་དེས་ནུབ་ཕྱོགས་བདེ་བ་བཀོད་པའི་ཞིང་ཁམས་ན་སེམས་ཅན་གྱི་དོན་བྱེད། མཚན་ནི་བྱང་ཆུབ་སེམས་དཔའ་དྲི་མེད་གྲགས་པ་བྱ་བར་ཐོགས་པ་ཡིན་གསུང་། ཡང་སྤྲུལ་དེས་ཤར་ཕྱོགས་ཀྱི་འཇིག་རྟེན་གྱི་ཁམས་རིན་ཆེན་བྱེ་བས་བརྒྱན་པ་བྱ་བ་གཅིག་དུ་སེམས་ཅན་གྱི་དོན་མཛད། རྒྱལ་པོ་གྲགས་པ་མཐའ་ཡས་བྱ་བ་གཅིག་ཡོད་པ་དེ། རྒྱལ་འབངས་འཁོར་དང་བཅས་པ་ལམ་ལ་དགོད་པར་གཟིགས་པ་ཡིན། བླ་མའི་མཚན་ནི་བྱང་ཆུབ་སེམས་དཔའ་དྲི་མེད་ཟླ་བས་བརྒྱན་པ་བྱ་བར་ཐོགས་པ་ཡིན་གསུང་། དེར་སྐུ་ཡལ་ནས་སྟོང་རབ་འབྱམས་འཇིག་རྟེན་གྱི་ཁམས་ན་ཨ་ཤོ་ཀ་ཨ་མྱ་བྱ་བར་མཚན་ཐོགས། ཡང་སློབ་དཔོན་སྒོམ་པ་དེ་ཀོང་ཀ་བྱ་བ་མཁའ་འགྲོ་མའི་གནས་ཉི་ཤུ་རྩ་བཞི་ཡིན་པ་གཅིག་དུ་སྐུ་སྐྱེ་བ་བཞེས་ཟིན་གསུང་། ཕྱི་རོལ་པའི་རྒྱལ་པོ་གཅིག་འདུལ་བའི་དོན་དུ་ཡིན་གསུང་། ཡང་ངའི་བླ་མ་སྤེན་ཕུག་པ་དེ་ལ་སྟོད་
1-2-12b
གཙང་སོ་ན་སྐྱེས་ཟིན་གསུང་། མིང་ནི་དགའ་བའི་ཡེ་ཤེས་བྱ་བར་ཐོགས་གསུང་། བླ་མ་དཔལ་ཆེན་པོ་བྱང་ཕྱོགས་ཀྱི་འཇིག་རྟེན་གྱི་ཁམས་གཅིག་ཏུ་སྐུ་སྐྱེ་བ་བཞེས་ཟིན། འཇིག་རྟེན་གྱི་ཁམས་དེ་ནི་མུ་ཏིག་དྲ་བས་བརྒྱན་པ་བྱ་བ་ཡིན་གསུང་། བླ་མའི་མཚན་ནི་དཔལ་གྱི་འབྱུང་གནས་སྦས་པ་བྱ་བ་ཡིན། དེར་སེམས་ཅན་མང་པོ་ལ་ཕན་པར་འདུག་གསུང་། ཡང་ངའི་བླ་མ་ཀྲ་ར་བ་ཆེན་པོ་ཅོག་རོ་འབྲིང་མཚམས་ཀྱི་སྲུབས་རི་ན་སྐྱེས། འཛམ་བུ་གླིང་གི་ནུབ་ཕྱོགས་ཟད་སོ་ན། གྲོང་ཁྱེར་བདེ་ལྡན་བྱ་བ་ན་སྐུ་སྐྱེ་བ་བཞེས་ཟིན། བྱང་ཆུབ་སེམས་དཔའ་གྲགས་པ་མཐའ་ཡས་བྱ་བར་མཚན་ཐོགས། སེམས་ཅན་བྱེ་བ་ཙམ་གྱི་འདྲེན་པ་མཛད་གསུང་། དགེ་བཤེས་པ་ཚབ་ལོ་ཙཱ་བ་དེ་ཁ་ཆེའི་གྲོང་ཁྱེར་གྲིབ་གཏན་དེའི་ཕྲོལ་ན་པཎྜི་ཏ་གཅིག་དུ་སྐུ་སྐྱེ་བ་བཞེས་ཟིན། མཚན་ནི་རིན་ཆེན་འབྱུང་གནས་གྲགས་པ་བྱ་བར་ཐོགས། སེམས་ཅན་འགའ་ལ་ཕན་ཐོགས་པར་འདུག་གསུང་། ཡང་ངའི་བླ་མ་རྫོགས་པ་དེ་ཁ་ཆེ་དང་ནུ་ཆེའི་མཚམས་སུ་སྐུ་སྐྱེ་བ་བཞེས་ཟིན། སྔར་གྱི་ཕྱག་རྒྱ་མ་དེ་དང་དེང་སང་སྤྱོད་པ་སྣ་ཚོགས་བྱེད་གསུང་། མངོན་པར་ཤེས་པ་རྒྱ་ཆེན་པོ་ནི་ཁོང་ལ་སྔར་ནས་མངའ་བ་ཡིན་གསུངས་ཡང་སློབ་དཔོན་ཕྱ་པ་དེ་དེང་སང་ཁ་ཆེའི་ཡུལ་གྲིབ་གཏན་དུ་སྐྱེས་གསུང་། པཎྜི་ཏ་གཅིག་ཡིན། སེམས་ཅན་འགའ་ལ་ཡང་ཕན་པར་འདུག་
1-2-13a
༄༅། །གསུང་། ཡང་ངའི་བླ་མ་དངུལ་ཆུ་བ་དེ་ཏོང་ཀུན་རྒྱལ་པོའི་བུར་སྐྱེས། ཏོང་ཀུན་རྒྱལ་པོ་དེས་གསོལ་བ་ཐེབས་པ་ཡིན་གསུང་། རི་བོ་རྩེ་ལྔ་ལ་མཇལ་བ་གཅིག་ཀྱང་རྨི་ལམ་དུ་བྱུང་གསུང་། དགེ་བཤེས་གཞུ་དོན་མོ་རི་པ་དེ་འཛམ་བུ་གླིང་ཟད་སོའི་ནུབ་ཕྱོགས་རི་བོ་ཏ་ལའི་འགྲམ་དུ་བཞུགས་ཟིན། ཆོས་བརྡའི་སྒོ་ནས་གསུང་། སེམས་ཅན་མང་པོ་ལ་ཕན་པར་འདུག་གསུང་། ཡང་ངའི་སློབ་དཔོན་ཤེས་རབ་བྱང་ཆུབ་དེ་རི་བོ་བྱ་རྐང་གི་ཞོལ་ན་སྐྱེས་ཟིན། ལོ་བརྒྱད་ནས་རབ་ཏུ་བྱུང་ཟིན། བསྒྲུབ་པ་བྱེད་བདོ་གསུང་། ཡང་ངའི་བླ་མ་རས་ཆུང་པ་དེ་བལ་ཡུལ་བས་ཕར་ལོགས་ན་ཉིན་ལམ་གཉིས་ཀྱི་ས་ན་སྐྱེས་ཟིན༑ མཚན་ནི་རཏྣ་སུ་ཁ་བྱ་བར་ཐོགས་གསུང་། ཡང་ངའི་སློབ་དཔོན་ཤེས་རབ་རྡོ་རྗེ་དེ་འཕན་ཡུལ་དུ་སྐྱེས་ཟིན། བཀའ་གདམས་པ་གཅིག་ལ་བརྟེན་ནས་བསྒྲུབ་པ་བྱེད་གསུང་། ཡང་ངའི་སློབ་དཔོན་འཕགས་པ་དེ་བལ་ཡུལ་ཕམ་མཐིང་ཕར་ལོགས་ན་སྐྱེས་ཟིན། རྣལ་འབྱོར་པ་གཅིག་ཕྱག་རྒྱ་མ་གཅིག་དང་ལྡོམ་བུ་བྱེད་གསུང་། ཡང་ངའི་མཁན་པོ་ས་ཕུག་པ་དེ་རྒྱ་གར་ཤར་ཕྱོགས་ན་པཎྜི་ཏ་གཅིག་ཏུ་སྐུ་སྐྱེ་བ་བཞེས་གསུང་། ཡང་དགོང་ཀ་གཅིག་བླ་མ་ལྷ་རྗེ་དང་། བླ་མ་མིད་ལ་དང་མཇལ་གསུང་ངོ་། །དེའི་དུས་སུ་དུས་མི་མཚུངས་པ་མང་པོ་བྱུང་གསུང་། དུས་མི་མཚུངས་པ་ཇི་ཙུག་ལགས་ཞུས་པས། སྔོན་གྱི་
1-2-13b
བྲམ་ཟེ་ཆེན་པོ་ལ་སོགས་པ་དང་། ན་ནིང་ཕྱིས་ཀྱི་རྣལ་འབྱོར་པ་རྣལ་འབྱོར་པ་རྣམས་ཚོགས་འཁོར་གཅིག་གི་སྟེང་དུ་འཇོམ་པ་བྱུང་གསུང་། དེའི་དུས་སུ་བྱམས་ཆོས་ལ་སོགས་པ་བསྟན་བཅོས་མང་པོ་ཡང་བྱུང་གསུང་། དེས་ནི་མཁྱེན་པ་ད་ལྟར་བ་ཆེ་ལོང་ཙམ་བཤད་ནས། ད་ནི་འདས་པ་མཁྱེན་པ་ལ། སྐྱེ་བ་འདིའི་སྔ་མ་ལ་སློབ་དཔོན་རིན་པོ་ཆེ་གར་སྐུ་སྐྱེ་བ་བཞེས་ཞུས་པ་ལ། ཤར་ལུས་འཕགས་པོ་དང་། ལྷོ་འཛམ་བུ་གླིང་གཉིས་ཀྱི་བར་གླིང་ཕྲན་གཅིག་དུ་སྐུ་སྐྱེ་བ་བཞེས་གསུང་། གླིང་ཕྲན་མིང་ཅན་ནི་མ་ཡིན། གྲོང་ཁྱེར་ར་ཊ་པ་རཱ་ཛ་ཕ་ལ་ཡང་ཟེར། རྒྱལ་པོ་བཟང་པོའི་གྲོང་ཁྱེར་ཡང་ཟེར་བ་དེར་སྐྱེས། དགུང་ལོ་བརྒྱ་བདུན་བཅུ་རྩ་བཞི་ཐུབ་གསུང་། སྤྱོད་པ་ནུས་པ་ཙམ་ཡིན། དེར་ཡང་བླ་མ་ལྷ་རྗེ་དང་མཇལ། དེའི་དུས་སུ་བླ་མ་ལ་མ་ཧཱ་མ་ཡ་དང། སྒྲོལ་མ་ཡིད་བཞིན་འཁོར་ལོ་དང་། རྡོ་རྗེ་སེམས་དཔའི་སྒྲུབ་ཐབས་དེ་གསུམ་ཡང་ཞུས། དེའི་དུས་སུ་ཡང་ཁྱེད་འགའ་དེ་ན་ཡོད། གང་གང་ཡོད་ཞུས་པ་ལ། ཁྱེད་བཅུ་ལ་ངས་སྒྲོལ་མ་ཡིད་བཞིན་འཁོར་ལོ་བཤད་གསུང་། ཡོན་ཏན་འོད། དགེ་འདུན་འོད། ཡེ་ཤེས་བླ་མ། སྨོན་ལམ་བླ་མ། འབྱུང་གནས་བླ་མ། རྒྱལ་མཚན་བླ་མ། རྩང་ན་སྟོན་པ་ཚུལ་སེང་། ཏྲེ་ན་དགེ་བཤེས་དཀོན་མཆོག་དཔལ། རྡོ་རྗེ་ཤེས་རབ། བཀའ་གདམས་པ་གཅིག་ཡོད་གསུང་། སློབ་དཔོན་རིན་པོ་ཆེས་བླ་མ་
1-2-14a
༄༅། །ལྷ་རྗེ་ལ་ཚོགས་འཁོར་གཅིག་ཞུས་པའི་ས་ན་ཁྱེད་ཉི་ཤུ་ཙམ་ཡོད་གསུང་། གང་གང་ཡོད་ཞུས་པ་ལ། དགེ་བཤེས་བཀའ་གདམས་པ། སློབ་དཔོན་རིན་ཆེན་རྒྱལ་མཚན། སྟོན་པ་སངས་རྒྱས། གནས་གཉིས། དགེ་འདུན་གྲགས། སྨོན་ལམ་བླ་མ། རྡོ་རྗེ་ཤེས་རབ། དགེ་བཤེས་དཀོན་མཆོག་དཔལ། སྟོན་པ་ཚུལ་སེང་། དེང་སང་དབུས་གཙང་ན་ཡོད། བཙུན་མ་གཉིས་ཀྱང་འདྲེས། གཅིག་ས་དེ་ན་ཡོད༑ གཅིག་དབུས་ན་སྐྱེས་གསུང་། ཡོན་བདག་དགོན་པ་བས་ཡོན་བདག་བྱས། འབྲེལ་ཀ་ཅི་ཡོད་ཀྱང་དེ་ན་བྱས། ཡོན་བདག་ཁྱིམ་བདག་ཕྱུག་པོ་གཅིག་གི་བུ་ཡིན། འདིར་ཡང་ཡོན་བདག་བྱས། ཕྱི་མར་ཡང་ཡོན་བདག་བྱེད་པར་སྣང་གསུང་། མཁན་པོ་སྐ་བྲག་པ་དེས། ངའི་མཁན་པོ་ཐེངས་གཉིས་མཛད་གསུང་། སློབ་དཔོན་གྱི་ཡབ་ཀྱི་མཚན་གསུང་བར་ཞུ་བྱས་པ་ལ། ཡབ་ནི་རཏྣ་སྦས་པ། ཡུམ་ནི་སུ་མ་ཏ་བྱ་བ་ཡིན། སློབ་དཔོན་རང་གི་མཚན་ནི་སུ་མ་ཀིརྟི་བྱ་བ་ཡིན། རིགས་ནི་རྗེའུ་རིགས་ཡིན། ཡང་མཁན་པོ་ས་ནག་པ་དང་འབྲེལ་ཀ་ཅི་ཡོད་ཞུས་པ་ལ། དགེ་བཤེས་ས་ནག་པ་དང་། དགེ་བཤེས་ཡུལ་བར་བ་དང་༑ གཞན་གཅིག་དང་གསུམ་ལ་ངས་འཇུག་པའི་སྐྱབས་འགྲོ་དང་སེམས་བསྐྱེད་བྱས། གཅིག་གིས་མ་སྲུངས་པས་དེང་སང་སྔོན་ས་ན་ཡོད་གསུང་། མཁས་ཆེན་ནི་སྐྱེ་བ་སྔ་མ་ལ་པཎྜིཏ་གཅིག་ཡིན་གསུང་། 
1-2-14b
བྱང་ཆུབ་སེམས་དཔའི་ས་རིམ་དང་སྡོམ་པ་ཉི་ཤུ་པ་བཤད་གསུང་། དགེ་བཤེས་བླ་མ་འོད་ནི་མདོ་སྨད་སེ་ཚང་བྱ་བའི་ནང་དུ་སྐྱེས། སྐྱེ་ས་བཟང་པོ་ཡིན། རྒྱ་གར་གཅིག་གི་འགྲམ་ཡིན་གསུང་། དེར་སྐྱེ་བའི་རྒྱུ་མཚན་སྐྱེ་བ་སྔ་མའི་སློབ་དཔོན་གཅིག་དེ་ན་ཡོད། གྲུབ་ཐོབ་ཟེར་ཉན་གཅིག་ཡིན་གསུང་། སློབ་དཔོན་རིན་པོ་ཆེ་སྐྱེ་བ་དེའི་སྔ་མ་ལ་ཤར་ལུས་འཕགས་པོར་སྐྱེས་གསུང་། རིགས་ནི་རྒྱལ་རིགས་ཡིན། ལུས་ནི་མོ་ལུས་ཡིན། སྐྱེས་པ་ཡིན་ན་རྒྱལ་ས་འཛིན་དགོས་གསུང་། ཕའི་མིང་ནི་དགེ་བ་ཅན་ཡིན། མའི་མིང་ནི་ཤེས་རབ་ཅན་མ། བདག་ཉིད་ཀྱི་མིང་ནི་ཤེས་རབ་བཟང་མོ་ཡིན་གསུངས་ཆུང་ངུ་ནས་ཕ་མ་ཤི །བླ་མ་ལྷ་རྗེ་དང་མཇལ། བླ་མ་ལྷ་རྗེའི་མཚན་ནི་མ་ནི་བྲི་བརྟེན་དགེ་སློང་ཡིན། ངས་དགེ་སྙེན་གྱི་སྡོམ་པ་ཞུས། བསླབ་བྱ་ཚུལ་བཞིན་བསྲུངས། ཡོ་བྱད་མང་པོ་ཡོད་པ་ཀུན་བླ་མ་ལྷ་རྗེའི་ཕྱོགས་སུ་ཟད་པར་བྱས། དེའི་དུས་ན་ཁྱེད་མང་པོ་དེ་ན་ཡོད། ངའི་གྲོགས་པོ་མང་པོ་ཡང་ཡོད། བླ་མ་ལྷ་རྗེ་ལ་ཚོགས་གསོག་གཅིག་གི་དུས་ན་ཁྱེད་བདུན་དེ་ན་ཡོད། དགེ་འདུན་འོད། ཤེས་རབ་བླ་མ། སྨོན་ལམ་བླ་མ་ཁྱེད་གསུམ་གྱིས་ངའི་གྲོགས་ལྡན་བྱས། ཡོན་ཏན་འོད། ཡེ་ཤེས་འོད། ཡེ་ཤེས་འོད་ཟེར། གཞན་གཅིག་དང་ཁྱེད་བདུན་སྤུན་ཡིན། ཁྱེད་ཀྱི་ཕའི་མིང་ནི་དགེ་བ་གྲགས། མའི་མིང་ནི་དགེ་བ་བཟང་མོ་བྱ་བ་ཡིན་གསུང་། 
1-2-15a
༄༅། །སློབ་དཔོན་སྐྱེ་བ་དེའི་སྔ་མ་ལ། འཛམ་བུ་གླིང་གི་བྱང་ཤར་མཚམས་ན་སྐྱེས་གསུང་། ཆུ་ཀླུང་པད་མས་བརྒྱན་པ་བྱ་བ་ན། བྲམ་ཟེ་སརྫ་ན་ས་བྱ་བ་དེ་མཁན་པོ་ཡིན། དེའི་དུས་སུ་སློབ་དཔོན་ཌོམྦི་པ་ལ་རི་བྱ་སྐྱིབས་ན་གསོལ་བ་ཐེབས་པ་ཡིན། དགེ་བཤེས་བརྩོན་འགྲུས་ཤེས་རབ་དང་། རིན་ཆེན་རྒྱལ་མཚན་དང་། མདོག་མཁས་པ་དང་། སྨིན་ཀེ་ཇོ་སྲས་དང་བཞི་ངའི་མཁན་བུ་ཡིན། དགེ་བཤེས་ཕྱ་པ་སློབ་དཔོན་ཡིན། པཎྜི་ཏ་ཆུང་ངུ་གཅིག་ཡིན། དགེ་བཤེས་རྡོ་རྗེ་སེང་གེ་ཕྱ་པའི་སློབ་མ་ཡིན། ད་དུང་ཡང་ཕྱ་པའི་དྲུང་དུ་སྐྱེ་བར་འདུག་གསུང་། སློབ་དཔོན་སྐྱེ་བ་དེའི་སྔ་མ་ལ། ནུབ་བ་ལང་སྤྱོད་དུ་གླང་པོ་ཆེ་གཅིག་དུ་སྤྲུལ་ནས་སྐུ་སྐྱེ་བ་བཞེས་གསུང་། ཡོན་བདག་དགོན་པ་དེ་སྡིག་སྤྱོད་ཀྱི་རྒྱལ་པོ་གཅིག་དུ་སྐྱེས་པས་རྒྱལ་ཁམས་ལ་གནོད་པར་འདུག ཁོ་གླང་པོ་ཆེ་བདུན་བརྒྱ་ཙམ་དང་དམག་ཁྱེར་ལ་གཅིག་ལ་སོང་བའི་དུས་སུ། དམག་ཁྱེར་གོང་དེར། ཁོ་བརྫིས་ཏེ་བསད་པ་ཡིན་གསུང་། སྐྱེ་བ་དེའི་སྔ་མ་དེ་ཡང་། ནུབ་བ་ལང་སྤྱོད་དུ་སྐུ་འཁྲུངས། རབ་ཏུ་བྱུང་བ་ཡིན། མཚན་ནི་དྷརྨ་ཨ་ཐི་བྱ་བ་ཡིན། དེའི་དུས་སུ་ངའི་བླ་མ་དེ་སློབ་དཔོན་ཏེ་ལོ་པ་ཡིན། ངས་སེམས་ཅན་འགའ་ལ་ཡང་ཕན་པ་གཅིག་ཡིན་གསུང་། སློབ་དཔོན་རིན་པོ་ཆེ་སྐྱེ་བ་དེའི་སྔ་མ་དེ། རྒྱ་གར་ནུབ་ཕྱོགས་ཨུ་རྒྱན་དུ་སྐུ་འཁྲུངས། རྣལ་འབྱོར་པ་གཅིག་
1-2-15b
ཡིན༑ དེ་ཡི་དུས་ཀྱི་ངའི་བླ་མ་དེ་ཡང་སློབ་དཔོན་ཏེ་ལོ་པ་ཡིན། དེའི་དུས་སུ་ངས་དབང་བསྐུར་བའི་སློབ་མ་བཞི་འདི་ན་ཡོད། རྡོ་རྗེ་འབུམ། སྒོམ་སྔོན། ཤཱཀྱ་ཤེས་རབ། བསྒོམ་པ་ཆོས་དཔལ་དང་བཞི་ཡིན་གསུང་༑ མཚན་ནི་ཤཱི་ལ་དན་ཏི་བྱ་བ་ཡིན། ནུས་པའི་མཆོག་ཏུ་གྱུར་པ་ཡིན་གསུང་། སྐྱེ་བ་དེའི་སྔ་མ་ལ། སློབ་དཔོན་རིན་པོ་ཆེ་ཀ་ལིང་ཀའི་རྒྱལ་ཁམས་སུ་སྐུ་སྐྱེ་བ་བཞེས། རྒྱལ་པོ་ཟླ་བས་རྣམ་པར་གནོན་པ་བྱ་བ་ཡིན། རྒྱལ་པོའི་སློབ་དཔོན་སངས་རྒྱས་ཡེ་ཤེས་ཞབས་བྱ་བ་ཡིན། ཡེ་ཤེས་ཞབས་ཀྱི་སློབ་དཔོན་ནི་འཇམ་དཔལ་བཤེས་གཉེན་ཨ་བ་དྷ་ཏི་པ་ཡིན། རྒྱལ་བ་དཔལ་ལྡན་འབྲས་སྤུངས་ཀྱི་མཆོད་རྟེན་ལ་བསྐོར་བ་ལ་སོང་བའི་ཚེ། ནམ་མཁའ་ནས་སྒྲ་གྲགས་པ། ཁྱོད་ད་དུང་དངོས་གྲུབ་མི་ཐོབ་པས་སོང་ལ་འདུས་བྱས་ཀྱི་དགེ་བའི་རྩ་བ་གྱིས་གསུང་། དེ་ནས་དགེ་འདུན་གྱི་སྡེ་བཙུགས་འདུས་བྱས་ཀྱི་དགེ་རྩ་མང་དུ་མཛད་གསུང་། དེ་ནས་ཕར་བཞུད་པས་བསྐོར་བ་མང་པོ་མཛད་པས་ཐུན་མོང་གི་དངོས་གྲུབ་མ་ལུས་པ་ཐོབ། སྔར་དང་པོ་བཞུད་པའི་དུས་སུ་ཁྱི་གཉིས་ཟླ་ལ་སོང་བས་ཐུན་མོང་གི་དངོས་གྲུབ་ཐོབ། དེང་སང་ཨུ་རྒྱན་དུ་འཇིག་རྟེན་གྱི་མཁའ་འགྲོ་མ་གཉིས་སུ་སྐྱེས། གཞན་པས་གདུག་རྩུབ་ཀྱང་ཆེ་གསུང་། དེའི་དུས་ཀྱི་རྒྱལ་པོའི་འཁོར་མང་པོ་འདི་ན་ཡོད་གསུང་། ཀརྟི་བ་མང་པོ་དང་། གཞན་ས་སྨད་ཀྱི་མི་
1-2-16a
༄༅། །མང་པོ་དང་། དེ་མ་ཡིན་པ་མང་པོ་ཡོད་གསུང་། དེའི་དུས་ན་སྟོན་པ་སངས་རྒྱས་དང་། དགེ་བཤེས་རིན་ཆེན་རྒྱལ་མཚན་གཉིས་ལ་ཐུན་མོང་གི་དངོས་གྲུབ་མང་པོ་ཡོད་གསུང་། ད་མེད་པ་ཅི་ལགས་ཞུས་པ་ལ། དེའི་དུས་སུ་བསྒྲུབས་པས་ཡིན་གསུང་། དེའི་དུས་ཀྱི་སློབ་དཔོན་སངས་རྒྱས་ཡེ་ཤེས་ཞབས་ནི་བླ་མ་ལྷ་རྗེ་ཡིན་གསུང་། འཇམ་དཔལ་བཤེས་གཉེན་ཨ་བ་དྷཱ་ཏི་པ་ནི་བླ་མ་མིད་ལ་ཡིན། དེའི་དུས་སུ་ཁྱེད་བཅུ་གསུམ་གྱིས་གསོལ་བ་ཐེབས་པ་ཡིན་གསུངས། དུས་གཅིག་ནི་མ་ཡིན་སྔ་ཕྱི་ལ་ཡིན་གསུང་། སྟོན་པ་སངས་རྒྱས། རིན་ཆེན་རྒྱལ་མཚན། ཡོན་ཏན་འོད། ཡོན་ཏན་བླ་མ། དགེ་འདུན་གྲགས༑ སྨོན་ལམ་བླ་མ། དེང་སང་གཅིག་དབུས་ན་ཡོད། ཏྲེ་ན་གཅིག་ཡོད། དེས་ནི་ཡུལ་ཀ་ལིང་ཀའི་རྒྱལ་པོ་ཟླ་བ་རྣམ་པར་གནོན་པ་བྱ་བར་སྐུ་སྐྱེ་བ་བཞེས་པ་ཚུན་ཆད་ཀྱི་བདུན་གསུངས་པའོ།། །།
༄། །སློབ་དཔོན་རིན་པོ་ཆེ་ད་འདིའི་ཕྱི་མ་ལ་གར་སྐུ་སྐྱེ་བ་བཞེས་ཞུས་པ།
སློབ་དཔོན་རིན་པོ་ཆེ་ད་འདིའི་ཕྱི་མ་ལ་གར་སྐུ་སྐྱེ་བ་བཞེས་ཞུས་པ་ལ། རྒྱ་གར་ནུབ་ཕྱོགས་ཨུ་རྒྱན་གྱི་བྱང་ཤར་ན། ཀརྟི་ཀའི་གྲོང་ཁྱེར་བྱ་བར་སྐྱེ་གསུང་། བླ་མ་ལྷ་རྗེ་གྲོང་ཁྱེར་པདྨ་ཅན་དུ་སྐུ་སྐྱེ་བ་བཞེས་ཟིན་འདུག །མཚན་ནི་ཞི་བའི་གོ་ཆ་བྱ་བར་ཐོགས་གསུང་། གྲོང་ཁྱེར་དེ་ན་མུ་སྟེགས་ཀྱི་པཎྜི་ཏ་གཅིག་ཡོད་པ་དེ་དང་། བླ་མ་ལྷ་རྗེ་བགྲོ་གླེང་བྱུང་། བླ་མ་ལྷ་རྗེས་ཤེས་པའི་བདག་པོ་བྱས། མུ་སྟེགས་ཀྱི་པཎྜི་
1-2-16b
ཏས་ཤེས་བྱའི་བདག་པོ་བྱས། དེ་ནས་རྩོད་པ་བྱུང་ནས་བརྩད་པས་བླ་མ་ལྷ་རྗེ་རྒྱལ། དེ་ནས་མུ་སྟེགས་ཀྱི་སྟོན་པ་དེ་ནང་པ་སངས་རྒྱས་པ་བྱས། མིང་ཡང་དྷརྨ་རཱ་ཛ་བྱ་བར་བཏགས་གསུང་། མུ་སྟེགས་ཀྱི་རྒྱལ་པོ་དེའི་མིང་ནི་མ་ཧཱ་ཛཱི་ན་བྱ་བ་ཡིན། གྲོང་ཁྱེར་ཀརྟི་ཀ་ན་པཎྜི་ཏ་བོ་དྷི་བཛྲ་བྱ་བ་གཅིག་ཡོད། པཎྜི་ཏ་དེ་ཡང་ནང་ན་ཡོན་ཏན་བཟང་པོ་ཡོད་གསུང་། བླ་མ་ལྷ་རྗེ་གྲོང་ཁྱེར་པདྨ་ཅན་དུ་མུ་སྟེགས་ཀྱི་རྒྱལ་པོ་བཏུལ་བ་དང་། ཡུལ་ཀརྟི་ཀའི་རྒྱལ་པོ་པཎྜི་ཏས་བཏུལ་བ་གཉིས་དུས་གཅིག་ཡིན། བླ་མ་ལྷ་རྗེ་རིན་པོ་ཆེ་དང་། སངས་རྒྱས་པའི་པཎྜི་ཏ་དང་། མུ་སྟེགས་ཀྱི་པཎྜི་ཏ་དང་གསུམ་ཀ་རྒྱལ་པོའི་མཆོད་གནས་ཡིན་གསུང་། གྲོང་ཁྱེར་པདྨ་ཅན་དང་། ཀརྟི་ཀ་དེ་གཉིས་ཀྱི་བར་ན་གྲོང་ཁྱེར་ཉུང་ཉུང་གཅིག་ཡོད་པ་དང་། ཡུལ་ཕྱོགས་དེ་མུ་སྟེགས་ཀྱི་ས་ཕྱོགས་ཡིན་པ། ཕྱིས་ནང་པ་སངས་རྒྱས་པ་བྱས་གསུང་། གྲོང་ཁྱེར་དེ་གཉིས་ཀྱི་བར་ན་ཉིན་ལམ་གཉིས་ཙམ་ཡོད་གསུང་། ཨུ་རྒྱན་གྱི་བྱང་ཤར་མཚམས་ན་ཡིན་གསུང་། སློབ་དཔོན་ཉིད་ཀྱི་ཡབ་ཀྱི་མཚན་ནི་དྷརྨ་སིདྷི་བྱ་བ་ཡིན་གསུང་། ཡུམ་གྱི་མཚན་མ་ཧཱ་པྲཛྙཱ་བྱ་བ་ཡིན་གསུང་༑ སློབ་དཔོན་ཉིད་ཀྱི་མཚན་ནི་པྲཛྙཱ་ཤཱི་ལ་བྱ་བ་ཡིན་གསུང་། ང་དེ་ན་བླ་མ་ལྷ་རྗེ་དང་མཇལ་གསུང་། ཡོན་བདག་དགོན་པ་ཡང་དེ་ན་བློན་པོ་གཅིག་གི་བུར་སྐྱེས་ཟིན། རབ་ཏུ་བྱུང་བ་བྱས་ཟིན་གསུང་། 
1-2-17a
༄༅། །ཁྱེད་འགའ་ཡང་གྲོང་ཁྱེར་ཀར་ན་པ་དེར་ནི་སྐྱེ་བར་འདུག་གསུང་། གྲོང་ཁྱེར་དེ་གསུམ་ཡང་ཕྱོགས་གཅིག་ཐབས་སུ་ཡོད་པ་ཡིན་གསུང་། དེ་ན་སྐྱེ་བ་གང་གང་ལགས་ཞུས་པ་ལ། ཡོན་ཏན་འོད། དགེ་འདུན་འོད། སྨོན་ལམ་བླ་མ། ཡོན་ཡེ་ཤེས་འོད། སྟོན་པ་ཚུལ་སེང་། དགེ་འདུན་གྲགས་ཁྱེད་བདུན་ལྷན་ཅིག་ཏུ་སྐྱེ་གསུང་། རིགས་ནི་རྗེའུ་རིགས་ཡིན། གཞན་ཡང་ཁྱེད་མང་རབ་ཡུལ་ཕྱོགས་དེར་སྐྱེ་གསུང་༑ སློབ་དཔོན་རིན་ཆེན་རྒྱལ་མཚན། སྟོན་པ་སངས་རྒྱས། སྟོན་པ་བྱང་ཆུབ་གྲགས། སྟོན་པ་བསོད་ནམས། དཔོན་དར་མ་རཱ་ཛཱ། ཤཱཀྱ་ཤེས་རབ། སྒོམ་སྔོན། རྡོ་རྗེ་འབུམ། དགེ་བཤེས་རིན་ཆེན་གྲགས༑ དབང་ཕྱུག་གྲགས། འོད་ཟེར་བླ་མ། ཡོན་ཏན་བླ་མ། དར་མ་སེང་གེ །རྡོ་རྗེ་བརྩོན་འགྲུས། བྱང་པ་ལྷ་བཟོ་ལ་སོགས་པ་མང་པོ་སྐྱེ་གསུང་། ཁྱེད་མང་རབ་བླ་མ་ལྷ་རྗེ་དང་མཇལ་རྒྱུ་ཡིན་པ་ལ་མ་མཇལ༑ ཕྱི་མ་ལ་མཇལ་བ་འོང་བར་འདུག་གསུང་། སློབ་དཔོན་རིན་པོ་ཆེ་སྐྱེ་བ་དེའི་ཕྱི་མ་ལ་གང་དུ་བཞུད་ཞུས་པ་ལ། བོད་ཡུལ་དབུས་སུ་ལྷོ་བྲག་གྲུབ་པའི་གནས་བདུན་བྱ་བ་ཡོད། དེར་སྐྱེ་བར་འདུག་གསུང་༑ ཡུན་རིང་པོ་ནི་མི་བཞུགས། ཁྱེད་འགའ་དང་དེར་ཕྲད་པར་འདུག་གསུང་། དེའི་ཕྱི་མ་ལ་སྐུ་སྐྱེ་བ་གང་དུ་བཞེས་པ་ལགས་ཞུས་པ་ལ། ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ཏུ་སྐྱེ་བར་སྣང་
1-2-17b
གསུང་༑ དེ་ན་ཡོན་བདག་དགོན་པ་དེ་རྒྱལ་པོ་གཅིག་དུ་སྐྱེ། ལམ་རྣལ་མ་ལ་སྡོད་ཚུད། ཁྱེད་རྣམས་དང་ཡང་དེ་ན་ཡང་མཇལ། དེ་ནས་ནི་ང་མི་དགོས་པ་ཡང་མང་པོ་འབྱུང་གསུང་། གཞན་མང་རབ་ལ་ཡང་ཕན་པར་འདུག་གསུང་། བླ་མ་རིན་ཆེན་རྣམ་ཐར་ནོར་བུའི་གླིང་འདྲ་ལས། །ཤཱཀྱའི་དགེ་སློང་དགེ་འདུན་འོད་དང་ནི། །ཤཱཀྱའི་དགེ་སློང་སྨོན་ལམ་བླ་མ་ཡིས། །བླ་མ་རིན་ཆེན་ཞལ་ནས་ཐོས་པ་ལས། །བདེ་ཆུང་བ་ཡིས་སྡེབས་ཏེ་ཡི་གེར་བྲིས། །གུས་བཅས་དགེ་བ་ཟླ་བ་དྲི་མེད་དེས། །རྗེ་ཡི་སློབ་མ་ཞལ་མཐོང་གསུང་ཐོས་རྣམས། །བློ་གྲོས་མཐུན་ཞིང་དང་བ་ཐོབ་པ་དང་། །ཐེག་ཆེན་ལམ་གྱི་སྡོང་པོ་ལ་ཞུགས་ནས༑ ༑བླ་མའི་རྣམ་ཐར་མ་ལུས་ཐོབ་པར་ཤོག །རྗེ་འགྲོ་བའི་མགོན་པོ་རིན་པོ་ཆེའི་རྣམ་ཐར་སྐྱེས་རབས་དང་བཅས་པ་རིན་ཆེན་ཕྲེང་བ་འབྲིང་པོ་ཞེས་བྱ་བ་རྫོགས་སོ། །དགེའོ།། །།

